Նորություններ
Երաշխիքային ժամկետում ապրանքների սպասարկման կարգը և պայմանները
Մի շարք ապրանքների համար նախատեսվում ապրանքի սպասարկման երաշխիքային ժամկետ, որի ընթացքում վաճառողը պարտավոր է անվճար վերացնել ապրանքի թերությունները։ Երաշխիքային ժամկետն սկսվում է ապրանքը գնորդին հանձնելու պահից։ Երաշխիքային ժամկետը երկարաձգվում է այն ժամանակով, որի ընթացքում ապրանքը չի կարող օգտագործվել դրանում հայտնաբերված թերությունների պատճառով։
Ապրանքը պետք է ողջամիտ ժամկետում պիտանի լինի այն նպատակներին, որոնց համար այդ տեսակի ապրանքը սովորաբար օգտագործվում է: Ապրանքի որակի երաշխիքը տարածվում է դրա բոլոր բաղադրամասերի վրա։
Եթե ապրանքի նկատմամբ սահմանված չէ երաշխիքային ժամկետ, գնորդը կարող է ապրանքի թերությունների հետ կապված պահանջներ ներկայացնել պայմանով, որ վաճառված ապրանքի թերությունները հայտնաբերված լինեն ապրանքը գնորդին հանձնելուց հետո ողջամիտ ժամկետում` ոչ պակաս, քան երկու տարվա ընթացքում։
Փոխադրման կամ փոստով առաքման ենթակա ապրանքի թերությունների հայտնաբերման ժամկետը հաշվարկվում է ապրանքը նշանակման վայրը հասնելու օրվանից:
Այն դեպքերում, երբ պայմանագրով նախատեսված երաշխիքային ժամկետը երկու տարուց պակաս է, իսկ գնորդը թերությունները հայտնաբերել է երաշխիքային ժամկետի ավարտից հետո, սակայն ապրանքը գնորդին հանձնելու օրվանից հետո` երկու տարվա ընթացքում, վաճառողը պատասխանատվություն է կրում ապրանքի թերությունների համար, եթե գնորդն ապացուցում է, որ ապրանքի թերություններն առաջացել են մինչև ապրանքն իրեն հանձնելու պահը կամ մինչև այդ պահը ծագած պատճառներից:
Երաշխիքային ժամկետի պայմանները գործում են նաև մատուցված ծառայությունների, աշխատանքների կատարման պայմանագրերի դեպքում։ Կատարված աշխատանքի անպատշաճ որակի վերաբերյալ պահանջներ ներկայացնելու համար հայցային վաղեմության ժամկետը մեկ տարի է, իսկ շենքերի եւ շինությունների համար` երեք տարի:
Որոշ ապրանքի նկատմամբ՝ օրինակ սննդամթերքի, դեղորայքի դեպքում, սահմանված է պիտանիության ժամկետ, գնորդն իրավունք ունի թերությունների հետ կապված պահանջներ ներկայացնել, եթե դրանք հայտնաբերվել են ապրանքի պիտանիության ժամկետի ընթացքում:
